Ikje nga trilli i perendive, Amik Kasoruho

Titulli: Ikje nga trilli i perëndive
Origjinali: Ikje nga trilli i perëndive
Gjinia: Roman
Autori: Amik Kasoruho
Shtëpia botuese: Buzuku
Viti: 2009
Fq. 280
Pesha: 0.39 kg
ISBN: 978-9951-08-109-1

Mbi librin

"Ikje nga trilli i perëndive" i shkrimtarit Amik Kasoruho është romani që mban peshën e fatit të një njeriu, të cilin e burgosin në moshën 17 vjeçare, duke i mohuar rininë, i pushkatojnë të atin pas tre vjetësh; nënën e tij kërcure e ngrenë në mes të natës dhe e internojnë në rrethinat e Lushnjës; familjen që krijoi pas daljes nga burgu, ia dëbojnë për 25 vjet të mundimshëm në Gosë të Kavajës. Dhe në fund, ikja nga Shqipëria.

Fragment nga libri

Ishte dhjetor dhe ai e dinte që në atë periudhë të vitit babai i tij, i punësuar prej disa vitesh në Rubik, në minierën e bakrit, ishte shumë i zënë me punë.
-Se... sepse jam transferuar këtu.
-Në Tiranë? Sa gjë e bukur! Po ku?
-Në të vërtetë, tashti për tashti jam në dispozicion, por...
-Mos u bëj merak baba. Ajo që vlen është se je kthyer sërish në Tiranë. Sa gjë e bukur! Do jemi sërish të tre bashkë!

Në atë kohë duhej të bënte edhe gati shtatë vjet burg. Ai e përjetonte si gëzim të vërtetë atë që ishte preludi i një tragjedie. Tre muaj më vonë babanë e tij e pushkatuan.

Koment nga Miranda Haxhia

Nuk janë vetëm dëshmi historike, pasi në Shqipërinë komuniste ato janë me mijëra. Veçantia e shkrimtarit është se arrin të përcjellë këtë histori përmes artit. Kjo është forca dhe fuqia e artit të vërtetë. Një fjali e prerë, një strukturë të cilën rrallë e gjen kaq të goditur; funde ngjarjesh që janë si hallka e që të bëjnë të vëmendshëm se diku do t'i lexosh sërish, ndaj, mos e lësho librin; një kaleidoskop i vërtetë kujtimesh: këto janë më shumë se çdo roman autobiografik.

Nëse në Itali botimi i këtij libri u prit me kërshërinë që kanë të huajt për historinë e vendeve të vogla, në Shqipëri, në Kosovë, ky libër e tejkalon kufirin e kureshtjes. "Ikje nga trilli i perëndive" është libër që trondit. Është kjo tronditje që i duhet kombit tonë, sepse ndryshe do na mbulojë harresa, veli i padukshëm e joshës i skllavërisë dhe diktaturës.

Ky është një detyrim moral të cilin e mbajmë brenda vetes dhe që i ka rrënjët te arsyeja. Në këtë rast mëson për sjelljen. Jo të një individi. Të një personazhi. Por të një kohe të zaptuar keqas nga një prej diktaturave më të egra komuniste.