Nje hap drejt se panjohures, Mbreteresha Noor

Titulli: Mbretëresha Noor, Një hap drejt së panjohurës
Gjinia: Autobiografi
Autori: Mbretëresha Nur e Jordanisë
Shqipëroi: Aurel Manushi
Shtëpia botuese: Dudaj
Fq. 416
Pesha: 0.45 kg.

Mbi librin

Një hap drejt së panjohurës është një dokument i mrekullueshëm. Kjo është historia e një amerikaneje të re, e cila u bë bashkëshortja dhe bashkëpunëtorja e një monarku arab. Ky libër paraqet një portret tërheqës të të ndjerit Mbret Husein dhe përpjekjet e tij gjatë gjithë jetës për t'i sjellë paqen rajonit të dërrmuar nga lufta, këndvështrimin e një dëshmitareje reale për hendekun në rritje midis Shteteve të Bashkuara dhe kombeve arabe.

Po ashtu ky libër është historia e sinqertë e një nëne dhe gruaje që diti ta mbante më së miri barrën që i ra duke qenë bashkëshortja e një burri shteti. Por mbi të gjitha është një histori dashurie – ditari intim i një gruaje që u dashurua marrëzisht pas një mbreti dhe popullit të tij. E lindur në një familje të shquar amerikano-arabe dhe rritur mes privilegjesh, Lisa Halaby ndoqi vitin e parë të studimeve në universitetin e Princeton-it dhe në vitin 1974 u diplomua për arkitekturë dhe urbanistikë.

Dy vjet më vonë, teksa kishte ardhur në Jordani të vizitonte të atin, u njoh rastësisht në pistën e aeroportit me Mbretin Husein. Fort i admiruar në gjithë botën arabe si zë i moderuar dhe pinjoll i drejtpërdrejtë i profetit Muhamed, Huseini u bë shumë shpejt beqari më i lakmueshëm në botë pas vdekjes tragjike të së shoqes. Herën tjetër që u takuan Huseini ra kokë e këmbë në dashuri me vajzën e çiltër dhe sportive të mikut të tij të ngushtë prej kaq vitesh. Pas një lidhjeje të fshehtë e marramendëse Lisa Halaby u bë Noor Al Hussein (Nur Al Husein), Mbretëresha e Jordanisë.