Kujtime, Ismail Qemali

Titulli: Kujtime
Origjinali: The memoirs of Ismail Kemal Bey
Gjinia: Kujtime, histori
Autori: Ismail Qemali
Shqipëroi: Abdurrahim Myftiu
Shtëpia botuese: Toena
Viti: 2009
fq. 496
Pesha: 0.612 kg.
ISBN: 978-99943-1-558-1

Fragment nga libri

U linda në muajin janar 1844 në Vlorë (ose Aulona), qytet shqiptar, ku shumë kohë më pas do të shpallja pavarësinë e atdheut tim. Im atë ishte Mahmud bej Vlora, kurse ime më, Hedie Hanëmi, nga Gjirokastra. Po vija në jetë pas epokës më të rëndësishme që Perandoria Osmane, ku bëntë pjesë edhe Shqipëria, kishte përshkuar në krejt historinë e saj.

Rrëzimi i sundimtarit sovran Ali Pasha të Janinës; kushtetuta e mbretërisë së Greqisë; njohja e qeverisjes gjysmë të pavarur të Mehmet Aliut në Egjipt; hyrja e Perandorisë Osmane në Koncertin Europian, bashkë me rrjedhojat e kësaj ngjarjeje të rëndësishme; shpallja e Hattit të Gjylhanesë, e cila hapi epokën e barazisë e të drejtësisë për të gjithë popujt e Europës, pavarësisht nga raca dhe feja- këto qenë ngjarje me rëndësi të madhe dhe ndikim po aq të madh dhe të shumanshëm.

Greqia hynte si pykë brenda kësaj Perandorie në Europë, pykë që në çdo rast mund të ngulej edhe më thellë dhe kësisoj të këpuste trungun europian të Turqisë e madje të kërcënonte stabilitetin e kryeqytetit vetë. Njëherazi, krijimi i një dinastie myslimane në Egjipt, e cila formonte një qendër të Islamit kundër Hexhazit dhe bazës së botës arabe, ishte në dëm të Kalifatit të Sulltanit.