Zjarret e vjeshtës, Irene Nemirovsky

Titulli: Zjarret e vjeshtës
Origjinali: Les feux de l'automne
Gjinia: Roman
Autori: Irène Némirovsky
Shqipëroi: Diana Çuli
Shtëpia botuese: Botimet IDK
Viti: 2016
Fq. 288
Pesha: 0.301 kg.
ISBN: 978-9928-136-42-8

Koment nga Diana Çuli

Një roman tjetër magjepsës, rrëqethës dhe i mrekullueshëm i Irène Némirovsky-t... Subjekti i romanit fillon me Luftën e Parë Botërore dhe mbaron me të Dytën, pak përpara se vetë autorja të rrëmbehet nga kthetrat e çmendurisë njerëzore.

"Zjarret e vjeshtës" është një roman për luftën, për dashurinë, për pasionin, për rininë e humbur, për pabesinë e tradhtinë, për kotësinë, zhgënjimin, po edhe për lumturinë, që gjendet, si shkëndija të vogla, por gjithnjë të pranishme, mes kaosit, hidhërimeve e dëshpërimeve të jetës.

"Zjarret e vjeshtës" është përsëri një shpalosje e talentit të veçantë të Nèmirovsky-t, e aftësisë së saj për të zbërthyer shpirtin e njeriut, marrëdhëniet e ndërlikuara mes shoqërisë dhe individit, varësisë së tij prej rrethanave, po edhe aftësisë së tij për të gjetur shtigje shpëtimi. Një vepër, e shkruar me mjeshtëri të rrallë, që të shtyn të mendosh gjatë mbi atë që njeriu i bën botës dhe vetes."

Mbi autoren

Irène Némirovsky lindi më 1903 në Kiev, në një familje të pasur bankierësh hebrej, që emigroi në Francë pas Revolucionit. Pasi kreu studimet, ajo shkroi një sërë veprash të cilat e afirmuan në skenën letrare franceze. Në vitin 1942, arrestohet nga gjermanët, të cilët e dërguan në kampin e përqendrimit të Aushvicit, ku dhe vdiq në moshën 39 vjeçare.

Për disa dekada u duk sikur emri i saj qe harruar, por rreth 60 vjet pas vdekjes së saj, në vitin 2006, u botua romani i saj 'Suita franceze', të cilin ajo e kishte lënë në dorëshkrim, që e bëri sakaq Irène Némirovsky-n të famshme në mbarë botën si një ndër shkrimtaret madhore të letërsisë europiane. Romani 'Zjarret e vjeshtës' konsiderohet një prej kryeveprave të saj.