Trainspotting, Irvine Welsh

Titulli: Trainspotting
Origjinali: Trainspotting
Gjinia: Roman
Autori: Irvine Welsh
Shqipëroi: Lori Nikolla
Shtëpia botuese: Dituria
Viti: 2017
Fq. 328
Pesha: 0.426 kg.
ISBN: 978-9928-217-61-5

Mbi librin

I furishëm, vulgar, përqeshës, romani Trainspotting rrëfen jetën e një grupi djemsh nga Edinburgu, mes seksit e drogës, grindjeve, vërdallosjeve dhe inateve. Rentoni, Sik Boi, Spudi dhe Begbi janë të mallkuarit e një modernizmi dhe një ferri kimik, që jetojnë një jetë të çatrafiluar dhe në arrati, në kërkim të vazhdueshëm të shpëtimit, për t'i dhënë një kuptim ekzistencës së tyre.

Të tmerruar nga ideja e të qenit të ngërthyer në qorrsokakun e varfër e provincial apo në trekëndëshin shtëpi-familje-punë, gjejnë te droga dhe te dhuna, mundësinë e vetme për të mbushur boshllëkun e ditëve të tyre.

Disa do të vdesin, ca do të vazhdojnë një jetë të pasigurt në zgrip të greminës, të tjerë syresh do të arratisen, duke lënë pas krahëve, njëherë e mirë e vendosmërisht, drogën, shokët dhe Britaninë e Madhe.

Tanimë një klasik që nuk rresht së të befasuari për origjinalitetin e mjeteve shprehëse, për agresivitetin, për vrazhdësinë e gjuhës dhe shumëllojshmërinë e regjistrave, Trainspotting është romani tronditës, që ka bërë epokë dhe i ka dhënë zë një brezi.

Gjuha eksplicite, personazhet e përshkruar me një force të jashtëzakonshme, të gjallë sa mund të të flasin nëpërmjet faqeve, filmi tej mase popullor, e kanë kthyer këtë libër dhe Irvine Welshin në një klasik të vërtetë.

Komente nga autori

Trainspotting nuk ishte vetëm romani im i parë, por edhe përpjekja ime serioze për të shkruar, prandaj më bën shumë krenar. Një libër të cilin mund ta shkruaja veç në një pikë të jetës sime.

E nisa me zell kur isha tek të tridhjetat, duke parë pas, në moshën 22 – 23 vjeçare. Dukej kohë e largët atëherë, sepse kisha një jetë krejt tjetër. Them se kur ke qenë copë – copë, kërkon ta kuptosh edhe shkakun, si të punonte truri dhe, ç'është më e rëndësishmja, cilat ishin pikat e kthesës. Mendoj se personazhi i Rentonit më përngjante më shumë, asokohe.

Shpesh nëpër intervista më pyesin nëse e urrej romanin "Trainspotting", pasi suksesi i tij mund të ketë lënë në hije gjithçka tjetër që kam bërë. Por, me siguri, këtë pyetje ma bëjnë njerëz që nuk kanë shkruar dhe nuk do të shkruajnë kurrë një libër.

Dëshira jote si shkrimtar është që njerëzit të lexojnë librat e tu, si me të parin që të bëri të njohur. Kjo është një ëndërr e bërë realitet.

Fragment nga libri

Zgjidh jetën. Zgjidh të paguash kredinë; zgjidh makinën larëse; zgjidh automjetet; zgjidh që të ulesh në divan e të shohësh lojëra televizive që të mpijnë trurin e të shkërmoqin shpirtin, duke rrasur ushqim jocilësor në stomak. Zgjidh të kalbesh drejt vdekjes, të pshurresh e të dhjesësh brekët në një shtëpi, një zhgënjim për llaskuçët egoistë e të dhjerë që ke sjellë në jetë. Zgjidh jetën.

Komente mbi librin

"Flaka e pashuar e një romani që shënjoi ardhjen e një talenti të ri. "Trainspotting" është një rrjetë e ngatërruar fijesh që nisen nga thellësia e zemrave të drogaxhinjve, vagabondëve dhe psikopatëve, që përballen me jetën në kryeqytet. Cit me humor të zi, ky roman është i mrekullueshëm."

Herald Tribune

"A ka një shkrimtar më shkatërrues, nihilist e të pamëshirshëm, por në të njëjtën kohë aq të dashuruar me jetën sa Irvine Welshi? Vështirë se po... Gati e pamundur."

Corriere della Sera