Muza e haresë, Goliarda Sapienza

Titulli: Muza e haresë
Origjinali: L'arte della gioia
Gjinia: Roman
Autori:Goliarda Sapienza
Shqipëroi: Aida Baro
Shtëpia botuese: Pegi
Viti: 2016
Fq. 650
Pesha: 0.607 kg.
ISBN: 978-9928-228-08-6

Mbi librin

"Muza e haresë" është libri rebel dhe skandaloz i një shkrimtareje të jashtëzakonshme. Është një roman aventure, një autobiografi e trilluar. Është një roman formimi, por edhe erotik, politik dhe sentimental.

Modesta është një grua siçiliane, "kock' e fortë", me një gjallëri dhe pasion të pazakontë, thuajse imorale për rregullat e shoqërisë së asokohshme, tek e cila dëshirat epshore gërshetohen me zgjuarsinë.

Ajo përshkon të gjitha tufanet historike dhe stuhitë sentimentale, e mbrojtur nga një hajmali e paepur e brendshme: muza e haresë. Modesta lind më 1 janar 1900 dhe qysh prej atij çasti veçse ndërton e formon vetveten, pjesë pas pjese, gabim pas gabimi, gëzim pas gëzimi.

Ajo përjeton mbi kurrizin e vet të gjitha detyrimet e mundshme që i shtron jeta përpara, krejt shpërfillëse ndaj sjelljeve të kohës, ndaj gjykimit të njerëzve, ndaj zakoneve shoqërore, seksuale dhe fetare.

Historia e saj është ajo e një shpirti dhe e një trupi, krejtësisht të pazgjidhshëm nga njëri – tjetri, që përshkon shekullin XX, me vullnetin dhe ndërgjegjen për të qenë vetvetja, plotësisht dhe me çdo kusht, pa iu ndrojtur vetmisë, pikëllimit, keqkuptimeve, luftës dhe dhunës. Kryefjala e jetës së saj është liria. Mosbindja është virtyti i saj më i lartë.

Fragment nga libri

Ajo fjalë, "dashuri", ishte e pashmangshme dhe e prerë, si lindja dhe vdekja dhe, me vetëdije duhet ta pranoje që s'e dije pse ekzistonte, kur, si e ku ndodhte, e drejt cilash brigje të bokërrimta apo lëndinash të blerta do të na shtynte.

Komente mbi librin

"... është një roman i vërtetë, që do t'ju tërheqë e do t'ju tronditë, një roman plot drithërima e zgjuarsi, konkret në maksimum, erotik dhe familjar, psikologjik dhe politik, me rrënjët në një ishull të populluar nga bajamet e egra dhe nga hakmarrjet. Një roman që na paraqet këndvështrimin e një gruaje të jashtëzakonshme për jetën tonë, paragjykimet tona, aktualitetin tonë."

Catherine David, Nouvel Observateur

"Ky libër është një himn kushtuar haresë. Haresë më të thjeshtë që mund të ekzistojë, ajo që na vjen nga ndërgjegjja dhe pranimi i vetes, e bashkë me të vjen pranimi i të tjerëve, i gjërave dhe njerëzve që, sidoqoftë, bashkëpunojnë për të krijuar atë lumturi që askush s'mund të na e rrëmbejë."

Corriere della Sera

"Po aq i pakufi, i plotë dhe i parezistueshëm si gruaja që ka në qendër, romani "Muza e haresë" përputhet krejtësisht me titullin që ka. Ndjenja e fuqishme e Modestës për të jetuar kapërcen çdolloj pengese që mund t'i vijë nga "dhembja, poshtërimi dhe frika" dhe ajo arrin të përqafojë "rrjedhën e jetës"".

The Independent

Mbi autoren

Goliarda Sapienza (1924 – 1996) lindi në Katania, Siçili, në një familje revolucionarësh socialistë. Aktivitetin letrar e nisi me romanin "Lettera aperta" (1967), pasuar me tituj të tjerë, ndër të cilët "Muza e haresë", që pa dritën e botimit vetëm pas vdekjes së saj. Shkrimtare e refuzuar dhe e censuaruar në gjallje, sot librat e saj po rivlerësohen në rang ndërkombëtar.