Në flakët e Izmirit, Dinos Koubatis

Titulli: Në flakët e Izmirit
Gjinia: Roman
Autori: Dinos Koubatis
Shqipëroi: Kristo Pulla
Shtëpia botuese: Toena
Viti: 2015
Fq. 320
Pesha: 0.401 kg.
ISBN: 978-9928-205-15-5

Mbi librin

Një familje e pasur dhe fisnike e Smirnit (Izmirit), me origjinë nga Kreta, përjeton në vitin 1922 shkatërrimin e qytetit ku ajo jeton. Nga ajo rrëmujë e përgjithshme që mbizotëroi, familja del dhjetëfish e zvogëluar në numër; ata që arritën të mbijetojnë pas një udhëtimi të stërmundimshëm, do të përfundojnë në Kretë dhe në Pire.

Së bashku me të tjerë të dëbuar nga atdheu i tyre, do të përballen dhe do të luftojnë me një mijë e një vështirësi, do të ndërtojnë një jetë të re, por pa e larguar kurrë nga zemra dhe nga mendja e tyre qytetin më të famshëm të Azisë së Vogël, ndërsa plagët që hapi në trupat dhe shpirtrat e tyre çrrënjosja nga atdheu, nuk u mbyllën asnjëherë.

Shkrimtari përshkruan me ngjyra të errëta momentet tragjike të një lufte shfarosëse, stigmatizon, në bazë të fakteve historike, autorët e atij holokausti, duke ngarkuar me përgjegjësi të gjithë ata që ishin shkaktarë të atyre ngjarjeve tragjike dhe duke u dhënë njëkohësisht të drejtë viktimave të asaj katastrofe, e cila la gjurmë të pashlyeshme në histori.

Fragment nga libri

Teksa anija po largohet, teksa zërat dhe të qarat, britmat therëse të nënave dhe ulërimat e dhembjes që lëshojnë fëmijët, ngjiten lart në qiell së bashku me tymin e zi dhe të dendur nga qytetit i Izmirit, që u është dorëzuar flakëve, i strukur në krahët e nënës sime, duke shtrënguar me forcë dorën e motrës sime më të madhe, qaj pa pushim prej frikës, qaj për shtëpitë tona që i pashë tek po shembeshin përtokë sikur të ishin kulla prej letre, qaj për tim atë, për gjyshin dhe për të gjithë të afërmit e mi që humbën në atë turmë të dëshpëruar dhe nuk mundën të hipnin në anije së bashku me ne.

Përpiqem të kuptoj se çfarë kishte ndodhur me saktësi, sepse nga njëri moment në tjetrin, fatkeqësia trokiti në dyert tona dhe ne e lejuam të futet brenda e të na shkatërrojë.
Sa e bukur që ishte jeta në Izmir!

Nëpër rrugicat, në lagjet e saj, aty te moli, ku çdo të diel bënim shëtitje me prindërit dhe të gjithë njerëzit na respektonin e na përshëndesnin, pastaj shkonim nëpër pastiçeritë e këndshme, ku ne fëmijët mund të merrnim një pastë, një llokum ose një ëmbëlsirë me vanilje, më të mëdhenjtë të shijonin një kafe turke, zonjat një liker dhe zonjushat kadaif ose bakllava të freskët.

Mbi autorin

Dinos Koubatis lindi në Athinë. Ai studioi për teatër e filologji franceze dhe punoi si aktor e regjisor në Greqi dhe jashtë saj. Koubatis mori Çmimin Ndërkombëtar "Jonesk" për gjithë veprën e tij regjisoriale.

Gjithashtu ka marrë edhe çmime të tjera ndërkombëtare në teatër, por edhe për vepra letrare. Me cilësinë e shkrimtarit, ai i provoi pothuajse të gjitha zhanret. Janë botuar pothuajse njëzet libra të tij si në Greqi ashtu dhe në Francë, Poloni dhe Shqipëri.

Njëkohësisht është marrë me gazetari, ka punuar në radio dhe në televizion. Veprat e tij janë përkthyer në mjaft gjuhë, si dhe janë vënë në skenë në teatër apo janë shfaqur dhe janë transmetuar në televizion dhe në radio.

Në vitin 2007 u shpall Profesor Nderi i Bizantologjisë në Universitetin e Valencias dhe Anëtar Nderi i Akademisë Felgueiras të Portugalisë. Libri i tij "I shtrenjti im Ajvali", botuar nga Shtëpia Botuese "Psichogios", përbën objekt disertacioni në Katedrat e Studimeve Neohelenike të universiteteve të huaja.