Titulli: Dita Ditës (kopertina e trashë)
Origjinali: Alle Tage
Gjinia: Roman
Autori: Terèzia Mora
Shqipëroi: Anila Shuka
Shtëpia botuese: Onufri
Viti: 2015
Fq. 384
Pesha: 1.021 kg.
ISBN: 978-9928-186-55-3
Mbi librin
Romani fillon me një pamje të dhunshme: Një burrë gjendet i varur kokëposhtë në një kënd lojërash të një lagjeje të rrënuar të një metropoli gjerman. Është Abel Nema, një fenomen gjuhësor që di dhjetë gjuhë, por që rrallë e dëgjon t'i përdorë ato në bisedat e përditshme.
E përditshmja e këtij të riu nga Ballkani, i cili është arratisur prej vendit të tij për shkak të luftës, është e vetmuar, megjithë aftësitë e tij të jashtëzakonshme dhe gatishmërisë së shumë njerëzve për ta ndihmuar. Ai përpiqet disa herë të zërë vend në botën e re, punon si përkthyes, si mësues, shëtit vendin dhe shtetet fqinjë, e prapëseprapë mbetet jashtë saj.
Kapitull pas kapitulli zbulohen copëza nga jeta e tij dhe nevojitet durimi i një arkeologu për të krijuar prej këtij mozaiku ndodhish, personazhesh, fjalish të paplota apo fjalësh një tablo. E megjithatë tabloja mbetet e pjesshme: "Të tërën e njeh vetëm Zoti", thotë dikur Abel Nema.
Fragmente nga libri
Ajo që rrëfej unë janë ngjarje zemërthyese dhe/ose komike. Të skajshme dhe të çuditshme. Tragjedi, farsa, tragjedi të mirëfillta. Vuajtje fëmijërore, njerëzore, shtazore. Mallëngjim i mirëfilltë, sentimentalizëm i parodizuar, besim i sinqertë dhe dyshues. Katastrofa, vetëkuptohet.
Natyrore ose të tjera. E sidomos: mrekulli. Sa për to, kërkesa është gjithnjë shumë e madhe. Ne i blejmë mrekullitë gjithandej. Ose i marrim. Mrekullitë për ne janë. Jo më kot quhemi koha e mrekullive. Ata kanë martirët, ne kemi mrekullitë. Kuptoni.
Vendet latine janë veçanërisht të frytshme. E mira Babiloni e vjetër. Dhe, natyrisht, Transilvania. Ballkani e të tjerët. Vërtet i zotëroni ju të gjitha këto gjuhë? Të dhjeta?
Një njeri që duket si Krishti pa mjekër nuk mund të mos jetë gënjeshtër, apo jo? Ose si Rasputini. Rasputini është më mirë. Pas shpine kështu do t'ju quaj, dakord? Ç'të reja kemi nga Rasputini?
Në fakt njësoj është, i tha burri, një redaktor, Abel Nemas, kur e pa për herë të parë dhe të fundit. Për mua, gënjeni dhe/ose shpikni edhe ju. Kryesorja, të jetë e mirë. Ju më kuptoni?
Mirë, mirë, mirë. Shumë mirë. Me që ra fjala, nuk ka fare nevojë të gënjehet. Jeta është e mbushur me rastësi të tmerrshme dhe ngjarje të panumërta. Ju kuptoni.
Koment nga Juria e Çmimit të Panairit të Lajpcigut
"Një epos polifonik në prozë, një lloj legjende bashkëkohore shenjtorësh para sfondit të luftës së Jugosllavisë dhe një skicë e çartur për turpin e të qenit në botë në momentin e gabuar."
Mbi autoren
Terèzia Mora u lind më 1971 në Sopron të Hungarisë dhe prej vitit 1990 jeton në Berlin. Ajo punon si shkrimtare dhe përkthyese nga hungarishtja dhe ka fituar shumë çmime. Krahas atij të Panairit të Lajpcigut për këtë roman, në vitin 2013 ajo fitoi Çmimin e Librit Gjerman për romanin "Das Ungeheuer".
