Parfume, Philippe Claudel

Titulli: Parfume
Origjinali: Parfums
Gjinia: Roman
Autori: Philippe Claudel
Shqipëroi: Edmond Tupja
Shtëpia botuese: Ombra GVG
Viti: 2013
Fq. 102
Pesha: 0.236 kg.
ISBN: 978-9928-06-069-3

Fragmente nga libri

Me të mbërritur në Nansi, zë një apartament te "Rruga e Madhe", nr. 27, në lagjen më të vjetër të qytetit. Jam 19 vjeç. Eshtë muaji shtator i vitit 1981. Atje gjithçka është e ende e pistë, e zezë, familjet janë të varfra, me shumë fëmijë, shpesh nga Portugalia. Macet bëjnë lirshëm dashuri dhe shtohen pa pikë turpi nën hijen e kishës Sen-Epvrë.

Prostitutat, më të rejat, mbështeten mureve në sheshin Malval ose, më të vjetrat, i presin klientët nëpër dhoma, veçanërisht Zonja Aida, me të cilën bëj muhabet dhe asgjë më shumë. Jam larguar nga shtëpia e prindërve dhe nga konvikti i Lynevilit me diplomën e maturës në xhep. Jam regjistruar në Universitet, ku shkoj rrallë. Kohën e kaloj bareve, pijetoreve, kafeneve, birrarive. Ditën e nis herët, tek Ekselsiori, dhe e mbaroj shumë vonë, tek i njëjti Ekselsior.

Të dielave në darkë nëna shtron çarçafët e pastër, çarçafë te të cilët, gjatë gjithë ditës, ajo ka burgosur erën, dhe mua më pëlqej-në më shumë se çdo gjë tjetër këta çarçafë të ftohtë, në dimër, kur thëllimi i ka rrahur e ngurtësuar, nganjëherë edhe ngrirë, kur ata ruajnë nga kjo shuplakë diçka si prej dëbore e prej akulli, gjë që e bën edhe më të ashpër lëkurën e bardhë me kokërriza të pëlhurës së tyre të lashtë.

Kurrë nuk më ka pëlqyer të fle vetëm. Edhe kur e shoh veten fëmijë, më merr malli për një trup tjetër. Për ngrohtësinë, fuqinë, butësinë, frymën e vakët dhe rrahjet e tij të zemrës. Shpesh, kur do të më zërë gjumi, kam frikë nga diçka e keqe sa nuk bëhet më, diçka që nuk është vdekje, por braktisje, vetmi e pafund.

Mbi autorin

Philippe Claudel, shkrimtar, regjisor, profesor i letërsisë në Universitetin e Nansisë, u lind në Dombasle-sur-Meurte, Francë në 1962. Ai është lektor në Institutin Europian të Kinemasë dhe Audiovizualitetit për shkrimin e skenarit, si dhe profesor për të rinjtë, adoleshentët dhe personat me aftësi të kufizuara që vuajnë dënimin në burgje.

Romani i parë i tij u botua në vitin 1999. Që nga viti 2004, është edhe drejtor i një kolane në botimet e Stock Editions. Claudel është mbajtës i shumë çmimeve të rëndësishme si: "Marcel Pagnol" në 2000 e Goncourt në 2007. Romanet e tij janë përkthyer në shumë gjuhë të botës.