Dimri i njerëzve, Lionel Duroy

Titulli: Dimri i njerëzve
Origjinali: L'hiver des hommes
Gjinia: Roman
Autori: Lionel Duroy
Shqipëroi: Krenar Hadëri
Shtëpia botuese: Pegi
Viti: 2013
Fq. 300
Pesha: 0.363 kg
ISBN: 978-9928-4197-5-0

Mbi librin

Të izoluar në republikën e vogël, etnikisht "të pastër" për të cilën luftuan kundër fqinjëve të tyre kroatë dhe boshnjakë, serbët e Bosnjës, sot janë njerëz të dëshpëruar. Marku, personazhi – shkrimtar pas të cilit fshihet vetë autori, ndërmerr një udhëtim në skutat më të errëta të Europës për të hetuar vetëvrasjen e para gjashtëmbëdhjetë vjetëve të Ana Mlladiçit, vajzës së dashur të Rado Mlladiçit, gjeneralit të ushtrisë serbe të Bosnjës, njeriut të rrethimit të Sarajevës, përgjegjës për mijëra të vdekur.

Ana vrau veten një natë, me armën e preferuar të të atit. Një gjeneratë e tërë serbësh refuzon ta besojë se kjo është çka ka ndodhur me të vërtetë. I vlerësuar me çmimin Prix Renaudot des lycèens 2012, "Dimri i njerëzve" shpaloset si një reportazh shqetësues në trajtën e romanit, një teatër politik që shfaq një mori këndvështrimesh kundërshtuese. Kush është pjellë e urrejtjes dhe marrëzisë duket se është i dënuar të prodhojë vetëm urrejtje dhe marrëzi...

Komente mbi librin

"Si gazetar opinionist, autori ndërton sërish nga aq afër sa mundet kompleksitetin e kësaj lufte vëllavrasëse. Dëshmitë e të mbijetuarëve, kasapë dhe viktima, i bëjnë jehonë pyetjeve të tij mbi paaftësinë për të qenë të lumtur. Një libër i fortë, pothuajse tronditës."

L' Express

"Nga kjo zhytje në rrënojat e ish – Jugosllavisë, Lionel Duroy vazhdon kërkimin e tij për një pajtim intim. Në nivel kombëtar, si edhe në nivel njerëzor, çështjet e paracaktimit të fatit dhe të lirisë, që kanë të bëjnë gjithnjë me gjeanologjinë, mbeten të hapura."

Le Figaro

Mbi autorin

I katërti i dhjetë vëllezërve, Lionel Duroy de Suduiraut lindi në 1949 në Bizerte, Tunizi. Pasi punoi për një kohë të gjatë si gazetar (veçanërisht në "Libèration" dhe "L'Evènement du jeudi"), ai filloi të bashkëpunonte në shkrimin e disa biografive (Ingrid Betancourt, Sylvie Varta etj).

Ai është tashmë autori i dhjetëra romaneve, shpesh autobiografikë, midis të cilëve "Le chagrin" (2010), një sukses i madh në shitje dhe sipas kritikës.