Mbytja e anijes, Alessandro Leogrande

Titulli: Mbytja e anijes, vdekje në Mesdhe
Origjinali: Il naufragio, morte nel Mediterraneo
Gjinia: Reportazh
Autori: Alessandro Leogrande
Shqipëroi: Adrian Beshaj
Shtëpia botuese: Dudaj
Viti: 2012
Fq. 252
Pesha: 0.301 kg
ISBN: 978-99943-0-284-0

Mbi librin

Alessandro Leogrande ka hetuar gjatë mbi mbytjen e anijes të së Premtes së Shenjtë, ka takuar të mbijetuarit dhe të afërmit e viktimave, ushtarakët, avokatët, aktivistët e shoqatave antiraciste dhe është endur nëpër qytetet dhe fshatrat e Shqipërisë prej nga ishin nisur emigrantët.

Ajo ngjarje përbën një gur prove për të gjitha mbytjet e anijeve të tjera në të ardhmen, jo vetëm sepse qe rezultati i politikave të sprapsjes dhe të histerisë institucionale që i shkaktoi. Jo vetëm sepse në këtë aspekt Italia nuk ka bërë hapa përpara.

Jo vetëm sepse, me cinizëm të plotë apo mospërfilljen më të madhe, një forcë politike deri një vit më parë në qeveri vazhdonte të fliste për bllokimet detare në Mesdhe. Por, sepse, ndryshe nga shumë të tjera të mbështjella nga heshtja, është e mundur ta rrëfesh.

Fragment nga librit

Në orën 18.57 të 28 marsit 1997 një motovedetë e vogël shqiptare e stërngarkuar me emigrantë, Katëri i Radës, goditet me bash nga një korvetë e Marinës ushtarake italiane, Sibilla.

Brenda pak minutash anija shkon në fund të Kanalit të Otrantos. Është mbrëmja e së Premtes së Shenjtë. Të mbijetuarit janë vetëm 34, trupat e pajetë të gjetur 57, në pjesën dërrmuese gra dhe fëmijë. 24 personave nuk do t'u gjenden kurrë eshtrat.

Është njëra nga mbytjet më të tmerrshme të anijeve që kanë ndodhur në Mesdhe në njëzet vitet e fundit. Por sidomos, është tragjedia më e madhe në det e shkaktuar nga politikat e sprapsjes.

Komente mbi librin

"Tragjedia më e madhe e ndodhur në det e shkaktuar nga marrëveshje midis shteteve dhe nga politika sprapsjeje. Alessandro Leogrande na tregon te "Mbytja e anijes" duke përzier eposin e Conrad – it dhe paraqitjen dokumentareske të kujdesshme të "Me gjakftohtësi" të Truman Capote – s. Leogrande është ndoshta shkrimtar – reporteri ynë më i mirë, kronist kokëfortë dhe në të njëjtën kohë vizionar i së tashmes."

Filippo La Porta, "Left"

"Unë kam një djalë shqiptar, një familje shqiptare. Ajo që më bëri përshtypje nga libri është saktësia e Alessandro – s, ajo mënyra e tij për të mos dhënë asgjë të stërditur sentimentalist. Më kujtohet që Agamben – i disa ditë pasi u mësua lajmi për ngjarjen shkroi në një artikull aktakuzën më të madhe që mund të bëhej, ishin dy lista emrash që ai kërkonte: emrat e atyre që kishin përfunduar në det dhe emrat që kishin dhënë urdhrat për t'iu afruar derisa ta çiknin."

Gianni Amelio

Mbi autorin

Alessandro Leogrande (Taranto, 1977) është zëvendësdrejtor i së përmujshmes "Lo straniero". Shkruan një rubrikë të përjavshme në "Corriere del Mezzogiorno – Corriere della Sera" dhe bashkëpunon me të përditshme dhe revista.

Pas debutimit me "Një det i fshehur" (L'ancora del Mediterraneo), një hetim mbi qytetin e tij të origjinës në darën e krizës ekonomike dhe ndotjes së mjedisit, Alessandro Leogrande tregoi me reportazhe narrative mafiet e reja, lëvizjet e protestës, shfrytëzimin e argatëve të huaj nëpër fusha: "Shoqëritë kriminale, histori kontrabande dhe shumëkombëshesh", "Njerëz dhe rreshterë, udhëtim midis skllevërve të rinj nëpër fushat e jugut".

Me "Mbytja e anijes", libër që në Itali hapi një debat të gjerë, fitoi Çmimin Paolo Volponi për letërsinë dhe angazhimin qytetar dhe Çmimin Ryszard Kapuscinski "për aftësinë e të rrëfyerit të vendeve dhe kulturave, e të vëzhguarit dhe e të paraqiturit si rrëfimtar".