Libri i iluzioneve, Paul Auster

Titulli: Libri i iluzioneve
Origjinali: The book of illusions
Gjinia: Roman
Autori: Paul Auster
Shqipëroi: Ines Ikonomi
Shtëpia botuese: IDK
Viti: 2010
Fq. 308
Pesha: 0.34 kg
ISBN: 978-99956-810-8-1

Mbi librin

"Libri i iluzioneve", vepra e parë në shqip e Paul Auster, një ndër shkrimtarët më të rëndësishëm e më të lexuar të letërsisë së sotme botërore. Një figurë e kthyer thuajse në një kult për lexuesit e tij. Fitues i çmimeve më të rëndësishme ndërkombëtarë, mes të cilëve Çmimit të Akademisë Amerikane të Arteve dhe Letrave, si dhe të çmimit të Princit të Asturias (viti 2006).

Gjashtë muaj pasi kishte humbur të shoqen bashkë me dy djemtë në një aksident avioni, profesori David Zimmer vazhdon të jetë i kredhur në dëshpërim, kur befas një natë rastësisht i ndodhë të shohë disa pjesë të një filmi të humbur të periudhës së filmit pa zë, të një aktori e regjisori krejt të panjohur dhe të harruar, Hektor Man, që në vitin e largët 1928 ishte zhdukur papritur.

Befas jeta e profesor Zimmerit ndryshon teksa zbulimi i misterit që rrethon jetën e vërtetë të Hektor Manit i kthehet gati në një fiksim. Kështu ai nis një udhëtim të çuditshëm e mjaft intensiv, në një botë të mbushur plot gënjeshtra e iluzione, por ku ai gjen papritur sërish dashurinë.

Mbi autorin

I lindur në vitin 1947, Paul Auster është autor i një vepre që përfshin gati njëzet romane, disa libra me poezi, skenarë filmash, libra për fëmijë etj. Është njëkohësisht regjisor i disa filmave të suksesshëm. Suksesin Paul Auster e arriti në vitin 1987, me librin "Trilogjia e Nju Jorkut".

Ndër veprat e tij të tjera mund të përmenden romanet: "Leviathiani" (1993); "Timbuktu" (1999); "Njeriu në errësirë" (2008); "Udhëtim në skriptorium" (2006); "I padukshëm" (2009) etj. Sot, Paul Auster konsiderohet si një ndër shkrimtarët më të rëndësishëm amerikanë, si dhe një ndër figurat kryesore të skenës letrare botërore.