Shendetesia ne Skrapar, historia e zhvillimit, Nevruz Gerxhani

Titulli: Shëndetësia në Skrapar, historia e zhvillimit
Origjinali: Shëndetësia në Skrapar, historia e zhvillimit
Gjinia: Mjekësi, histori
Autori: Nevruz Gërxhani
Shtëpia botuese: Fan Noli
Viti: 2009
Fq. 592
Pesha: 0.575 kg.
ISBN: 978-99943-52-68-5

Koment nga Namik Shehu

Librin "Shëndetësia në Skrapar" e vlerësoj si një punë kërkimore – studimore serioze me nivel shkencor. Aty përmblidhen materiale me përmbajtje mjaft të zgjedhur, që interpretojnë dhe konceptojnë në mënyrë dinjitoze rrjedhën historike të mjekësisë në krahinën e Skraparit. Autori Nevruz Gërxhani, me guxim, me pasion dhe me plot talent ia paraqet lexuesit dhe botës mjekësore, si nder, sakrificë dhe krenari të punonjësve të shëndetësisë dhe të popullit heroik të kësaj krahine.

Leximi i librit të jep emocione, të mbush me një krenari të ligjshme, të kënaq dhe të bën optimist, kur njihesh me gjithë atë punë madhështore dhe plot sakrifica, që është kryer në këtë krahinë, duke e paraqitur me të drejtë, si qendër me nivel të lartë mjekësor.

Përgëzoj Nevruzin për punën vetëmohuese, që ka realizuar dhe mishëruar në këtë punim me vlerë. Shpreh admirimin tim që ish nxënësi, bashkëpunëtori, kolegu, shoku dhe miku im, ka pasqyruar me meritë veprimtarinë voluminoze të shërbimit shëndetësor të krahinës së Skraparit; duke u lënë një pasuri të vyer dhe një kujtim të paharruar bashkëqytetarëve të tij, brezit të tanishëm dhe pasardhësve.

Mbi autorin

Nevruz Gërxhani ka lindur në Gjergjovë të Skraparit më 22 mars 1941. Pas arsimit 7 vjeçar në Skrapar, në vitin 1960 përfundoi Politeknikumin Mjekësor të Tiranës për ndihmësmjek. Pas një viti pune si ndihmësmjek në Staraveckë dhe në Çepan vazhdoi në Fakultetin e Mjekësisë në Tiranë të cilin e përfundoi në vitin 1966.

Me mbarimin e fakultetit punoi një vit mjek inspektor sanitar dhe epidemiolog në Skrapar, për të cilën kreu dhe një kualifikim. Në shtator 1967 filloi mjek në spitalin zonal të Potomit ku punoi deri në gusht 1969. Në këtë vit u emërua përsëri mjek inspektor sanitar dhe epidemiolog në qendrën sanitare epidemiologjike të rrethit në të cilën vazhdoi deri në qershor 1970.

Më pas u caktua shef i seksionit të shëndetësisë ku punoi deri në dhjetor 1979. Në vitet 1974 – 1975 u specializua dermatolog në klinikën e dermatologjisë në Tiranë. Në vitet 1979 – 1982 punoi sekretar i komitetit ekzekutiv të Skraparit. Më pas u vendos drejtor i drejtorisë së mjekimit deri në vitin 1988 dhe nga ky vit deri në gusht 1991 ka punuar drejtor i drejtorisë së higjienës dhe epidemiologjisë.

Nga viti 1991 deri në 1997 vazhdoi mjek dermatolog në spitalin dhe poliklinikës së Çorovodës. Në fundin e vitit 1998 deri nëntor 2003, kur doli në pension, ka punuar mjek familje në poliklinikën nr. 10 në Tiranë. Gjatë punës është marrë me studime mjekësore dhe ka referuar në disa seksione shkencore të rrethit. Ka shkruar për probleme të ndryshme, kryesisht mjekësore në shtypin lokal dhe qendror. Është dekoruar dy herë nga ish Presidiumi i Kuvendit Popullor.