Kjo është Kina, Artan Goga

Titulli: Kjo është Kina! (kopertinë e trashë)
Origjinali: Kjo është Kina!
Gjinia: Histori, kulturë
Autori:Artan Goga
Shtëpia botuese: Onufri
Viti: 2014
Fq. 164
Pesha: 0.394 kg
ISBN: 978-9928-186-02-7

Koment nga autori

Vendet janë si njerëzit, kanë të mirat dhe të metat e tyre. Por ky është një libër kryesisht për të bukurën me të cilën Kina, vendi me një ndër qytetërimet më të lashta në botë, është e bekuar me shumicë.

Mund të tingëllojë si një shprehje klishe, por kur shkruan për një vend si Kina, nuk ia del dot të mos ndiesh peshën e një barre të rëndë, peshën e një kulture që të mrekullon me larminë e veçanësinë e saj, peshën e një historie që s'ka të dytë, peshën e një vendi të stërmadh jo vetëm nga numri i banorëve, por edhe prej asaj çka i ka dhënë mbarë njerëzimit e qytetërimit të përbashkët botëror.

Peshë të cilën asnjë libër e as një mijë nuk mund ta mbajnë dot. Por ky që keni në dorë është një libër mjaft larg të mëtuarit të diçkaje të tillë. Synimi i tij është më i thjeshtë: t'i flasë lexuesit shqiptar me sytë e një bashkatdhetari të tyre që ka jetuar prej vitesh në këtë vend sa larg, edhe pranë tyre.

Jo për të qenë një surrogat i njohjes së drejtpërdrejtë të këtij vendi, por në të kundërt, një ftesë për ta vizituar atë dhe për të parë e provuar vetë se çka ofron. Bukuria e një vendi nuk lidhen vetëm me anën pamore, por edhe me njerëzit e tij dhe me kulturën që ata kanë krijuar ndër shekuj.

Prandaj në këtë libër do të trajtohen disa përfaqësues të kulturës materiale e shpirtërore të popullit kinez, si festat, kuzhina, zejet e artet, por theksi do të vihet te njerëzit dhe shoqëria e sotme kineze, që po përjeton një ndryshim të shpejtë.

Kur thua "Kinë", mbase ndër fjalët e para që bashkëshoqërohet me të është Shangai, kjo qendër e stërmadhe industriale, financiare, kulturore etj. "fytyra" më ndërkombëtare e Kinës dhe pasqyra e zhvillimit marramendës të saj, veçanërisht gjatë dhjetëvjeçarëve të fundit.

Shangai është një qytet që "shtyp" me madhështinë dhe modernitetin e vet, me rrokaqiejt dhe rrugët ku makinat rrjedhin si një lumë i rrëmbyeshëm, jo vetëm dikë nga Shqipëria e vogël si unë, por edhe të ardhurin nga vendet më të mëdha e më të zhvilluara.

Sidomos natë, nëse hedh vështrimin nga ura magjepsëse mbi lumin Huangpu, që quhet si "lumi nën i Shangait", sheh detin e dritave shumëngjyrëshe që duken sikur të kapura përdore me njëra – tjetrën hedhin valle, duke të bërë të ndihesh si në një botë surrealiste.