Titulli: Problemi Spinoza
Origjinali: The Spinoza Problem
Gjinia: Roman
Autori: Irvin D. Yalom
Shqipëroi: Agim Doksani
Shtëpia botuese: Morava
Viti: 2012
Fq. 395
Pesha: 0.426 kg.
ISBN: 978-9928-120-90-8
Mbi librin
Amsterdam, 1656. Bento, në hebraisht Baruk, Spinoza është njëzet e tre vjeç dhe fort i përkorë e sqimatar në pamje: tipare të hijshme, lëkurë pa pikë ceni, sy të mëdhenj, të errët e të thellë. Dhe, pas atyre syve, një mendje që nuk stepet të bluajë mendime ekscentrike mbi besimin, që ushqen ide kaq të përçartura për botën, sa ngjall dyshimin për herezi.
Fshehurazi, Bentoja studion gjuhën dhe idetë e Aristotelit e të filozofëve të mëdhenj grekë në akademinë e Franciskus van den Endenit, ku një pjesë e mësimdhënies iu besua së bijës, Klara Marisë, një vajze me qafën si mjellmë dhe buzëqeshje joshëse, që aq keq ia trallisi mendjen Barukut, sa i ngjalli mendime të përlyera dhe dëshira që s't'i nxë goja t'i thuash brenda mureve të bashkësisë.
S'do shumë mend që ta kuptosh si i shkoi filli këtij edukimi filozofik dhe sentimental: mendimtari i ri u shkishërua dhe u shtrëngua të bëjë një jetë vetmitare, në zgrip, por që gjithsesi do të nxjerrë në dritë vepra që për nga thellësia dhe dramaticiteti i kanë shoqet e rralla. Vepra, që treqind vjet më vonë, e trazuan ligsht mendjen e "arianit" Rozenberg, që u bë një ndër themeluesit e partisë naziste dhe bashkëpunëtor i ngushtë i Hitlerit.
Komente mbi librin
"Një gjetje e arrirë që na bën të përjetojmë rishtas filozofinë e Spinozës nëpërmjet historisë së Gjermanisë naziste dhe figurës së Alfred Rozenbergut."
Abraham Verghese
"Romani më grishës që kam lexuar vitet e fundit. Irvin D. Yalom ka krijuar një vepër kaq fuqiplotë, sa është e pamundur ta lësh mënjanë. Ju ftoj me bindjen më të thellë ta lexoni."
Anthony Hopkins, aktor
"Si një mësues i mirë, Yalom i paraqet idetë pak nga pak, duke lëvizur me shumë kujdes nga njëra te tjera... Dialogët, që ai krijon, lënë një ndjesi të këndshme nga karakteri i filozofit dhe sjellin një shpjegim të qartë për idetë madhore të njeriut për natyrën, vullnetin e lirë dhe arsyen."
The Washington Post
"Yalom është autori i përsosur për t'i sjellë së toku Spinozën dhe Rozenbergun në një roman... Problemi Spinoza është një eksplorim fort intrigues i lidhjeve mes një filozofi hebre dhe një ideologu nazit."
Shelf Awareness
Mbi autorin
Irvin D. Yalom ka lindur në Uashington në vitin 1931. Është profesor i psikiatrisë në Universitetin e Standfordit dhe jeton e punon si psikiatër në Palo Alto, Kaliforni. Ka shkruar vepra të shumta, bestsellera ndërkombëtare, si "Kura e Shopenhauerit" dhe "Kur qau Niçja".