Visare shqiptare, fjale te urta, vol. 2

Titulli: Visare shqiptare, fjalë të urta, vëllimi i dytë
Origjinali: Visare shqiptare, fjalë të urta, vëllimi i dytë
Gjinia: Studime
Autori: Arsen Jani Mustaqi
Shtëpia botuese: Argeta LMG
Viti: 2006
Fq. 516
Pesha: 0.681 kg
ISBN: 978-99943-30-6-1

Mbi librin

Populli ynë në shekuj ka pasur shkëlqimet e veta në fushën e artit dhe të kulturës. Dëshmia më e gjallë për këtë janë edhe krijimet e ngritura prej tij në rrjedhën e shekujve deri në ditët tona, të asaj pasurie, që ne shqiptarët e thërrasim me krenari: "Visare të kombit".

Pjesë e pandarë e kësaj krijimtarie janë edhe fjalët e urta apo proverbat siç i quajmë ndryshe. Në këtë det të pafund, gjatë jetës time, më është dhënë rasti që edhe unë të ndihmoj në grumbullimin, studimin dhe botimin e këtij thesari.

Mbledhja e këtij materiali në këtë vëllim më ka detyruar të bëj një nga udhëtimet më të gjata, anë e kënd viseve shqiptare, brenda dhe jashtë kufijve shtetëror për vite e vite me radhë, për gati gjysmë shekulli, që nga vendlindja ime, Lukovë e Sarandës, e deri në Bris Mërtur të Tropojës dhe në shumë troje ku banojnë shqiptarë.

Ambientet e ngrohta familjare e shoqërore dhe kureshtja, ishin ato që më nxitën e më shtynë që vëmendjen time ta drejtoja në bisedat e ngrohta, që bëheshin sa në familje, në shoqëri, në shkollë, për të qëmtuar e bërë pronën time çdo "xhevahir" që dilte nga goja e atyre njerëzve të dhënë pas punës e të apasionuar pas dijes.

Shtysa e parë u bënë mësonjësit e shkollës fillore: Spiro Mëhilli, Myzafer Asllani, Jorgo Shameti e S. Kutra; të shkollës së mesme Th. Papapano, L. Franja, M. Bakiri e sidomos nxitja që më dha profesor Zihni Sako në Universitetin e Tiranës. Po ç'janë proverbat në vetvete?

Çfarë përfaqësojnë ato në tërësinë e krijimtarisë dhe të mendimit popullor; çfarë funksioni kanë luajtur dhe luajnë në jetën e përditshme të njerëzve dhe si ndahen ato nga frazeologjitë popullore, si dhe shumë aspekte dhe dukuri të tjera.

Në studimet e kryera më parë nga studiuesit vendas, sundon mendimi se ato "në thelbin e tyre" janë: "Gjykime e vlerësime nga më të ndryshmet të jetës materiale e shpirtërore të një populli"... Ato në tërësinë e tyre "përbëjnë një enciklopedi më vete të urtësisë e filozofisë së popullit, të mendimit, të psikologjisë së tij, të ndërgjegjes artistike e estetike" mbarë popullore.

Mbi autorin

Arsen Jani Mustaqi ka lindur më 08.10.1935 në katundin Lukovë të rrethit Sarandë. Shkollën fillore e mbaroi në vendlindje në vitin 1947, ndërsa atë 7-vjecare dhe të mesme i kreu në Gjirokastër pranë shkollave "29 Nëntori" e "Asim Zeneli" të po këtij qyteti në vitin arsimor 1953-54.

Në vitin 1954 filloi studimet e larta në degën Gjuhë- letërsi shqipe të Institutit të Lartë Pedagogjik Tiranë ku mbaroi pranë Universitetit të Tiranës në vitin 1958. Emërohet mësues i letërsisë në vitin 1958 në gjimnazin "Asim Zeneli" të qytetit të Gjirokastrës. Transferohet në Tiranë si bashkëpunëtor në Institutin e Folklorit. Për nje periudhe gati 12 vjeçare, krahas punëve të përditshme ka përgatitur emisionin e përjavshëm tek Radio Tirana: faqe nga krijimtaria e popullit shqiptar.